മടുപ്പുകളുടെ ആത്മകഥയേക്കുറിച്ച് ചിതൽ

ജലത്തിലേക്കുള്ള ഒരു മൺകുടത്തിൻ്റെ

ആളൽ പോലെ

ആളൽ ഒക്കത്തെടുത്ത ഉടലിൻ്റെ മൺകുടമേ

എന്ന് ഒരാന്തലിനെ

സമാധാനിപ്പിക്കുകയായിരുന്നു

ചിതലെടുത്ത സൂര്യനെ

അസ്തമയങ്ങൾക്ക് കാട്ടിക്കൊടുക്കുന്നു

ചിതലിൻ്റെ അരികിൽ 

മടുപ്പ് പെറ്റുകിടക്കും മൺതരികൾ

മടുപ്പുകളുടെ ചിതലിന്

മണ്ണിൻ്റെ മാമൂട്ടുന്നു

കുഴഞ്ഞ മണ്ണായി 

ചിതലുകൾക്ക് മുന്നിൽ

സൂര്യനും അസ്തമയവും അഭിനയിക്കുന്നു

ചിതലെടുക്കും മുമ്പ്

ചിതലെടുത്ത ശേഷം എന്ന്

കാഴ്ച്ചയേ ചിതലുകൾ വിഭജിക്കുന്നു

കാണികളായി ഞാനും ചിതലും

രണ്ടിടത്തേക്കും ചിതലുകൾ എത്തിനോക്കുന്നു

താൽപ്പര്യമില്ലാത്ത വണ്ണം

ചിതലുകൾ മടങ്ങിപ്പോകുന്നു

ഇനി ചിതലെടുക്കുവാൻ ഒന്നുമില്ല എന്ന 

നിഗമനത്തിൻ്റെ കർട്ടൺ അരങ്ങിൽ

മണ്ണിൻ്റെ ഹെഡ്ലൈറ്റുള്ള ചിതലുകൾ

ചിതലിൻ്റെ മൺതരികളുടെ 

പ്രകാശം അടിച്ച് 

കണ്ണുകൾ അസാധാരണമാം വിധം മഞ്ഞളിക്കുന്നു

ചിതലുകൾ ആവർത്തനത്തിൻ്റെ മൺതരികൾ കടക്കുന്നു

മടങ്ങിപ്പോകുന്നവരുടെ ഉടലിൽ 

ചിതലുകൾ ആഞ്ഞു ചവിട്ടുന്നു

ഉടൽ അസ്മതയത്തിൻ്റെ സസ്തനി

ആവർത്തനത്തിൻ്റേയും.