അതായതു

അതായതു..
ഒരു ക്യാരം ബോർഡിൻറെ ചതുരത്തെ
കളി കഴിഞ്ഞു നമ്മൾ അഴിച്ചെടുക്കുകയാണ്
അതിന്റെ നാലുകുഴികൾ നിരപ്പാക്കി
നഖങ്ങൾ സഹിതം
വിരലുകൾ ഉപേക്ഷിക്കുകയാണ്
ഉപേക്ഷിക്കുന്നതിനെ പുനർനിർമിക്കുന്ന ഒരാൾ
ഉപേക്ഷിച്ച ചതുരത്തിനെ ചെടിച്ചട്ടിയാക്കുമായിരിക്കും
ഉപയോഗിച്ച പൊടിയെ മണവും...
അവസാനം ഉണ്ടായേക്കാവുന്ന
പൂ പറിക്കാൻ
വിരലുകൾ അപ്പോഴും പുനരുപയോഗിക്കുന്നുണ്ടല്ലോ
അതാണ് ആശ്വാസം.
പക്ഷേ, അതല്ല അതിശയം...
കൊക്കുകൾ കൊണ്ട് തൊടാതെ
വാക്കുകൾ കൊണ്ടും നോക്കുകൾ കൊണ്ടും
ബഹുവചനങ്ങളാൽ മാത്രം
തൂവലുകൾ മിനുക്കി കൊണ്ടിരുന്ന
കിളികൾനോക്കിനിൽക്കേ
എന്നോ പൂർണമായും വിരിഞ്ഞു
സാങ്കത്യം തന്നെ എപ്പോഴോ നഷ്ടപ്പെട്ട
മൊട്ടുകൾ നോക്കിനിൽക്കേ
അതേ വിരലുകൾ
ഇറുത്തെടുക്കുന്ന പൂക്കളുടെ ആകൃതി
അതാ ഇതളുകളിൽ നിന്ന്
അഴിച്ചെടുത്തു തുടങ്ങുന്നു...